منتجع عمان السياحي - البحر الميت

السلام عليكم و رحمة الله و بركاته 

للاسف ,,, اليوم جاي بموضوع انطباعه سيء نوعا ما

مبارح ليله الجمعه 9-6-2011 

رحت انا و صحابي للبحر الميت و قررنا ننزل بمنتجع عمان السياحـــي 

و للاسف اني ندمت,,, ندمت لانه شفت مناظر ما كنت حابب اشوفها عنا بالاردن 

البحر الميت اهم بقعه على وجه الارض من كل النواحي ,, 

اولا ,, البحر الميت ,, اخفض بقعه على وجه الارض ,, و هالشي بجيب سياح كتير لبلدنا 

تانيا ,, البحر الميت ,, اهم بحر موجود على الكره الارضيه لما فيه من فوائد معدنيه عامه 

السياح بيجوا من جميع بقاع الارض لزياره البحر الميت و الاستفاده من املاحه و من طين البحر و منتجات البحر الميت 

الشط الموجود بمنتجع عمان السياحي يا اخوان ,, بيخزي ,, 

بيخزي بكل ما تحمه الكلمه من معنى ,, 

و ما بلوم اي حدا قبل ما الوم الزوار ,, شعبنا العزيز 

الزباله منثوره بكل متر على شط البحر ,, من جميع انواع الزباله ,, و سوري لتعبيري الحاد شوي ,, بس الموضوع كتير مستفز ,, 

بمنطقه الشوايات ,, المكان الي بنحضر فيه اكلنا ,, بتلاقي كياس ,, و علب فاضيه ,, و محارم ,, و زجاج ,, 

بتلاقي بواقي اكل ,, متعفن و طالعه ريحته  و الدبان معبيه ,, 

و المكان الي بتاكل فيه ,, بتلاقي طاولات وسخه ,, و الكراسي اوسخ ,, و بواقي العالم الي كانت قبلك بهاد المكان ,, موجوده و ما بيستنضفوا يكبوها رغم انه في حاويات موجوده صحيح قليله ,, بس موجوده ,,  

يعني بقول للناس الوسخه ببيوتها ,, ووسخه وين ما بتكون ,, 

انت لما تروح على مكان حابب تنبسط فيه ,, و تقعد انت و عيلتك او صحابك و تشووا و تاكلوا و تنبسطوا ,, مش بتقعد تدور على مكان نضيف تاكل فيه ؟  

ليه لما بتخلص سم الهاري تبعك ,, ما بتنضف وراك ,, 

والله يا جماعه الخير المنظر العام بيخزي ,, 

ازا احنا صحاب البحر الميت و الشط ما حافظنا عليه !! بدنا نجيب ناس من بره تنضف ورانـــا ؟؟؟ 

انا بتمنى كلامي هاد يوصل للمسؤولين و باي طريقه رايح احاول اوصله ,, لحتى يشوفوا احنا شو بنعمل ,,, 

والله البحر الميت كنز ,, ليه هيك احنا بنعمل ما بعرف !!